【反送中】高舉黃傘默默撐香港人　67歲伯伯：香港人加油！

在近期的「反送中」運動中，衍生出一種新的「兄弟爬山，各自努力」模式。有的市民未必可以長期在前線抗爭，但仍會以自己方式去支持香港人。Facebook專頁「義載 Van Drivers」近日就以《用自己方式的時代》為題，紀錄低67歲的伯伯、中學生、大學生等人各自的抗爭方式。

全文如下：

用自己方式的時代　2019年6月21日（星期五）

9:18am太古廣場行人天橋

太古廣場天橋上站著一位舉著黃傘的長者，他沒有高叫口號，只是一直安靜地站著，若有經過的市民對他說「加油」，他便以他的雄壯聲線回應一句「香港人加油」。我走到這個長者的旁邊，嘗試著去打破這刻的沉默。

「林鄭一日唔落台，政府一日唔撤回送中惡法，我逢一至五嘅朝早都會喺度企」長者堅定地說。

「點解你會揀呢度嚟企？」

「我呢幾日周圍企，我去過天星碼頭天橋、政府總部天橋。我67歲喇，我唔可以做前峰，但都可以做後衛，企喺度係心意，我支持年輕人。」長者指著後來的太古廣場天台續道︰

特別係我後面的死者，喺我以前返工嘅場跌死，我好唔開心，我喊左幾晚，我係人嚟㗎，我有血有肉㗎。

長者把退休前的工作娓娓道來，他在太古廣場當控制室主管逾20年，從太古廣場落成一直工作至10年前退休。「我唔係企嘅人，我係一個坐喺度工作嘅人，10年後返嚟PP，居然要喺度罰企，你覺唔覺得好諷刺？」我頓感語塞。

長者一轉口氣，輕鬆地說︰「我退休10 年，行得一日得一日。我會休息，會去食嘢，我識執生，唔會跌低。」我與長者揮手作別，繼續前往立法會示威區。半小時後，我在示威區附近再遇見他，他舉著傘，邊走邊向示威的年輕人大喊︰

香港人加油，我支持你哋！

▲ 不少市民都在香港各地遇到黃衫伯伯。（圖片來源：義載 Van Drivers Facebook）

12：23pm夏愨道、添華道交界

市民於上午11時走出夏愨道，夏愨道一時之間人頭湧湧，香港眾志黃之鋒馬上呼籲夏愨道的市民前往包圍警察總部，未幾，寬闊的夏愨道剩下寥寥數十人。烈日當空，市民坐在橋下的陰影躲避太陽。

15歲的中三學生阿聰剛剛完成最後一天的考試，趕到夏愨道現場。「近來香港發生太多事，呢幾日都無咩心機溫書，6月12號嗰日，我考完試就過咗嚟幫手。」阿聰的髮際滴著汗水，他一邊整理著頭盔口罩一邊說道。

我問︰「大部份人都去咗警總嗰邊，點解你要留喺政總呢度？」
「去警總作用唔大，我地係要表達聲音畀政府聽，所有事都係因為呢條逃犯條例而起，警察係其次。由佔中開始，成個香港政府都好有問題。」
「佔中嗰陣你得十歲咋喎！」

阿聰拉開N95口罩，露出一絲空𨻶，擦擦面上的汗水，說道︰「當年懵懂，只係唔明點解會咁亂？點解市民會畀催淚彈射？」阿聰回憶道，「近幾年，我開始睇返有關當年嘅資料，我就慢慢了解。」

我問︰「但夏愨呢邊真係好少人，你驚唔驚？」阿聰堅定地說︰

多唔多人唔緊要，有人肯嚟，做得幾多得幾多，起碼出份力，我地問心無愧、團結就足夠。

化整為零，一個都不能少

2:17pm 稅務大樓外

稅務大樓外已聚滿了身穿黑衣的市民，花園的噴水池已關閉，市民都坐在噴水池的階梯上，我本來打算爬上階梯以便找一個高角來拍攝人群，但階梯太高，對五呎多一點的我來說有點吃力。此時，一名黑衣市民向我伸出了援手。
「我幫你拎住部機先。」黑衣男生說。
「謝謝。」

拍攝了幾個俯視稅務大樓外聚集人群的鏡頭後，我與黑衣男生聊了起來。「你可以叫我做Chilam。」黑衣男生指著稅務大樓廣告版上的藝人張智霖說。有鑑於近年社會運動過後的秋後算帳，現在的市民學懂了帶口罩遮蔽樣子和用化名來保護自己。

「我今朝八點左右出到嚟，本身喺煲底坐，11點開始大家行出咗去夏愨道，然後就去警總企。無啦啦有個同我地一樣嘅無名氏就話，警總要嚟都無用，不如去稅局更加好，所以我就跟咗過嚟。我地沿住金鐘道，經過駱克道，再過橋就嚟到。」Chilam用手比劃，說道︰「開始過嚟嘅時候，一百人都無，但好快就聚到一大班人。」我們一起數現場人數，估計大約有四百人在這𥚃聚集。

我問︰「點解會嚟稅局？」Chilam用手抹一抹額角的汗水繼續說︰

不合作運動係要分散嚟打，唔可以每一次都死守，畀你死守到又如何？2014年畀你死守咗3個月，最後咪又係乜都無，今次點都要轉。

對於2014年曾在佔領區死守三個月的我，這句說話無疑打進入腦海𥚃，久久無能消散。當年大家守了三個月，卻爭取不了真普選，意志消沉了一段時間，甚至有幾個月時間不敢看《義載》的毛片。

▲ 在「反送中」運動中的市民，大多會帶口罩遮蔽樣子和用化名來保護自己。（圖片來源：義載 Van Drivers Facebook）

「轉。你又覺得呢個方法得？」我問。
「試囉，未試過點都要試。今日少人，成個港島最多有2萬人係我地嘅人，警察要清場嘅話，半個鐘都清得晒。反而而家咁樣仲好，無人會知下一步會點，大家都係為件事好，唔好分化就得，唔想嗌口號咪唔好嗌口號，唔想衝嘅人咪唔好衝，但人地想做嘅話，唔好鬧就得，總知自已諗，自己決定就得。」

「你幾多歲？」我問道。
Chilam回答︰「我20出頭，讀緊大學。」

此時，約一百名坐在地上的市民突然起來，大家向著同一方向前進。
Chilam問同行的友人︰「發生甚麼事？」友人回答︰「警總出咗黃旗。」
Chilam與友人便馬上動身走向警總的方向。
呼喊市民移動的聲音此起彼落，「警總出黃旗，我地過去喇！」「不如我地去入境處換身份證。」

2：44pm 入境事務大樓

黑衫市民遍佈大樓的地下和一樓樓層，開始封住各個出入口，對著出入的市民或職員大嗌「有出無入」，打算癱瘓公共事務運作。此時，一批為數約十人的黑衫開始乘搭自動扶手電梯到各樓層「洗樓」，他們整齊地排在扶手電梯，一邊乘搭自動扶手電梯，一邊高叫口號「撤回送中惡法」及「釋放被捕人士」。

半小時後，部分黑衫市民開始轉移陣地到金鐘政府合署，剩餘廿數黑衫市民逗留在大樓內，五、六名疑似便衣探員四處游走，似看非看地監視著他們。
那廿數名黑衫男女圍成一個圓圈討論著。

「呢度出入口太多，我地太少人，根本封唔到。」
「我諗我地都要轉移陣地，但最緊要一班人喺埋一齊，唔好漏低幾個喺度。嗰度仲有我地嘅人，叫埋佢過嚟一齊傾。」黑衫男生說完便轉身去找其餘同伴。
「轉去邊度我都無所謂，夏愨道又好，警總都好，最緊要一班人，唔好分散幾個畀人捉。」
「去警總無咩用，嗰度咁多人喺度，太多人堆埋一齊無意思。」
「不如我地走左出去再傾，嗰幾個便衣𥄫緊我地。」

5:17pm
我到附近一個休息處整理訪問錄音。黑衫市民在我身旁來來往往，有人席地而坐，有人小睡片刻，休息十數分鐘至半小時便再次動身。廢青痿（化名）和藍色憂鬱清潔員（化名）在我面前坐下休息，討論著警總的情況。

24歲廢青痿說道︰「今日出嚟主要係去警總，去政總意義唔大。」
35歲的藍色憂鬱清潔員答道︰「去警總係有意義，但我最希望能夠透過立法改變警民權力。」他續說︰「警察襲擊人，你不可以還手，還手就會變襲警。但執法者無理襲擊市民，市民應有權利去還手，甚至出手制止，以保障自己同別人嘅人身安全同埋生命財產。」

24歲廢青痿拿出紙巾抹著汗說︰「雨傘運動之後，警察尤如有牌黑社會，警權過大，本來應該係除暴安良，而家就變咗專打香港人的暴徒，我6月12號見到五、六個速龍圍住一個市民嚟打。」

藍色憂鬱清潔員開始滔滔不絕地說︰「初頭又話12號係暴動，跟住就開始含含糊糊，而家又話唔算係暴動，然後又話得5個人暴動。用政治方式去解決法律問題。」他續說︰「香港人唔怕坐監，但香港人好怕留案底，因為有案底嘅話，好多嘢都做唔到。如果唔會留案底，我諗香港人會有更多勇氣去抗爭。」

我問︰「你有幾多勇氣？」藍色憂鬱清潔員笑著回答︰

我都唔知道我有幾多勇氣，總之有幾多本事，就做出嚟。

廢青痿說︰「我地都抖夠，差唔多要行喇。」
「去警總？」我問。
「係。」兩人異口同聲回答。

文章獲 義載 Van Drivers 授權轉載
撰文 : 義載 Van Drivers